優資兒童

呢排好多專講點樣培養出優資兒童或入名校方法嘅報導，我見到個標題就唔想睇內容。因為如果做佢哋所講嘅方法，我肯定自己，老公同個女有極大壓力！我同意孩子係要培養，但我覺得因為各種因素，好多父母唔係培養佢哋仔女而係逼仔女成為佢吔心目嘅出色人士！用盡方法洗盡金錢要佢哋入名校，唔理佢哋有無興趣同天份都要佢哋上十幾種補習班同興趣班！但係啲父母重要呻話做佢哋司機又話仔女唔同佢哋溝通！唉，做司機唔係仔女逼你，你要佢哋back to back 咁四圍去上堂，你都要付出代價！你將佢嘅時間表編得咁『充實』，邊有時間同精神同你傾計！有時間精神都去同朋友玩啦！
我同囡囡一齊最好心就係見到佢開心！當然我對佢都有期望，但係我經常提醒自己，佢响呢個世界嘅目的唔係要達到我嘅期望，而係神對佢嘅期望！我唔係要逼佢成為我心目中嘅成功人士，而係我要幫佢培養同發展佢嘅興趣同才能！要重視同佢一齊嘅時間，彼此溝通，建立愛嘅關係！求神不斷提醒教導我使囡囡做佢所喜悅嘅兒女！

扭計

最近多機會單獨同囡囡一齊，所以多咗獨自面對佢扭計大喊嘅時候。我發覺當唔知囡囡為咩大喊嘅時候係最炆，但其實佢知我唔知佢喊咩佢重炆同慘！我相信佢如果可以講佢為咩喊，一定會講。可能係一路喊一路講，但一定想人知佢想點。就因為佢唔識講，我又唔知佢想點，佢只可以咁樣去表示佢嘅感受。我而家會响呢種情況下唔出聲，心中或出聲為佢祈禱，等佢發洩完後再呵佢，令佢知道媽媽知佢唔舒服或者唔開心，但會陪佢一齊同一樣咁錫佢！近住佢就會好可愛咁繼續佢『吃喝玩樂』嘅生活！
我相信大人都有時好似BB咁唔知點表達佢嘅唔開心，其他人以為佢哋『扭計』，所以講好多嘢叫佢哋『唔好扭計』，但只會弄巧成拙！因為佢哋好可能只想有人陪佢一齊，等佢發洩完後，呵呵佢就已經足夠。

多謝老公

最近去完trip，老公已經將每日行程寫响佢個blog，你想知個trip如何，可以睇佢個blog。响度我想多謝老公花咗好多精神時間去預備個trip。雖然個trip當中有唔開心嘅時候，但係並無減少我對你嘅appreciation and love！再一次讓我感謝神睗赐我一個好老公，囡囡一個好爸爸！(多謝你比我寫完呢個blog你先有得sleep！

空間

最近學緊一個功課就係俾空間別人。以前自己會好執著自己嘅意見，會覺得自己嘅意見好過別人。不過，當發現呢個性格對人同別人係負面多於正面嘅時候，我就去學接受別人嘅意見同做法。我發覺當我咁做嘅時候自己同人哋都舒服好多，而從中亦令我變得more flexible and receptive。我個女係呢個功課中最大嘅trainer亦係我最易會fail我嘅人！當然fail同pass暫時都係我自己定，但係從佢嘅反應都可略知一二。究竟同佢要有幾多距離，個discipline area點set同impose，幾時放手俾佢自己explore，幾時唔好將佢嘅態度take it personal等等‧‧‧真係教人容易做就難！身為counselor學過唔少parenting skills，但係自己要apply又做唔到嘅時候真係好慘！但亦因為咁樣更令我倚靠神去幫我作一個母親，同求神去教囡囡做合佢心意嘅人！呢個過程真係唔容易，我都仲有唔少struggle，求神幫我渡過！

唔通

今日原本要做facial但係覺得我個body需要take care 多啲，所以改做massage！我都預咗會好痛，因為自己都感覺到個body好tense，所以成個過程我多數係“ah ah”聲，而個massager就話我呢度唔通個度唔通。而我嘅conclusion係我成個人都唔通！真係發覺呢排自己好似好stuck，有時對要做嘅事有心無力，對自己會突然無信心，對個女嘅反應好敏感，對老公易發脾氣！响心理影響身理之下，就出現頭痛，頸緊，腰酸背痛等等嘅情形。响身理又影響心理之下，個人好易react than respond，於是成個人就stuck咗响度！係時候要通反自己，唔係再stuck落去嘅話，我怕自己都接受唔到自己！

囡囡黐老公

囡囡最近幾個月都好黐老公，只要老公响度佢一定要老公唔要我！瞓醒第一個見度我就喊！真係比佢呢啲反應攪到好嬲，好傷心！亦令到我對老公黑面！真係要求神幫助我去處理呢個問題，否則我都唔知點算好！

見證

從未試過一連三日從不同媒介聽/睇同一個人的見證，更未試過聽同一見證每次都會大受感動！許道宏牧師嘅見證就有咁樣嘅影響力。一個為神擺上所有，為人不計回報，何解神會容許柏金遜症同肝癌發生响佢身上！從許牧師嘅見證我睇到一個有血有肉嘅基督徒，佢面對咁大嘅痛苦，一樣有沮喪，有發嬲，有擔憂。佢卻無因為自己係牧師而隱藏呢一切嘅感受，佢甚至向神表達。但係佢最後選擇集中睇神俾佢嘅恩典，而唔係睇自己嘅苦難，佢就重新得力為神作工，更不斷的安慰有需要嘅人。佢嘅經歷同見證感動唔少人，亦因此帶領好多人信主。
許道宏牧師嘅見證令我流淚！佢係一個真正用生命去見證神嘅大能，用行動去回應神嘅大愛，使我重新去睇自己嘅生命應該點樣活落去！係將視線專注响困難同不如意嘅事上，憂憂愁愁咁生活連帶身邊嘅人都被影響到無朝氣；定係專心仰望神數算神嘅恩典，滿有盼望咁生活將神嘅香氣散發感染到其他人領會神嘅恩典同大愛！