囡囡祈禱

每晚瞓覺前我都會同囡囡一齊祈禱，因為想佢慢慢學祈禱，所以我只要求要佢開口祈禱一句，然後到我祈禱。佢有時會扭計唔肯祈，我就會同佢講點解要祈禱，要佢知道唔可以忘記多謝天父對我哋嘅愛。最近囡囡要我跟佢一齊祈禱，佢講一個字，我跟佢講一個字。我以為佢都只係一句就完，但係佢竟然講由返學到食晚飯前嘅事一一去多謝天父！我好開心佢識多謝天父咁多嘢！希望佢會保持呢個心常常去多謝天父對佢嘅愛！