一對一

愈忙嘅時候愈會爭取時間同朋友相聚，有時一大班人，有時一對一。兩者嘅唔同係前者可以同一時間見好多人，但唔能夠同個個人深入長談。後者可以有多啲時間互相分享近況，了解深啲。但係唔知點解我發覺當我同朋友一對一嘅時候，好多時候如果我唔出聲，對方好少會主動問我近況。我諗係咪佢無興趣想知我嘅事，定係佢等我自己講？如果佢無興趣想知我嘅事，我講佢都唔會想聽。如果佢等我自己講，佢都要俾我知佢想知邊方面嘅事，唔係嘅話我咪好似報告我近況佢知！對方亦好少打開話題！我好怕兩個人約出嚟見面，只係見到面；約出嚟食飯，只係食飯！Dead air 我係支持唔住，所以响咁嘅情形下，我只有不斷搵話題講。於是，同對方分開後會有種失落感，覺得自己無被關心！究竟問題出响邊？係時候求神比我知道！

交友

老公曾經同我講佢好擔心我會俾人呃，因為人哋對我好啲，我就會覺得佢係好人！我相信係我比較感性，人對我好，我就好快認定佢係好人！我唔鐘意一個對我好嘅人會係衰人，我會好唔開心！但係一個令我唔自在嘅人，我又會無興趣去了解佢可能係有好多優點嘅人！就因為咁樣令我响認識朋友，建立友誼上有障礙。幸好我有個受人歡迎嘅老公，雖然佢較靜，但個個人都樂意同佢交往。我慢慢從佢身學到點樣去欣賞唔同人嘅性格，又識得客觀啲去睇人，令我可以同人相處好啲，建立多啲友誼。

創意

我唔係一個好有創意嘅人，但係當有咗個女之後，我嘅創意逼咗出嚟！同一件玩具要諗唔同玩法，同一本書要唔同讀法，最新挑戰係同一食物唔同食法！唔知點解女女呢排唔肯飲奶！佢係好有性格，要唔做個樣嘢，無人逼到佢做。同樣，佢要做個樣嘢，就算逼到佢唔做，到要睇佢面色，受佢脾氣！佢唔飲奶我同老公諗可以俾佢食咩等佢有鈣質。終於我諗到整雞肉、薯仔、蘋果沙侓。用 Yogurt代 Salad Dressing. 佢食第一啖"lur"返出嚟！真失望！我知道又係時候逼啲創意出嚟！於是我將Chicken Salad變Chicken Salad Dip！Dip 完 Yogurt 俾佢食，佢就一啖一啖食！連多啲定少啲Yogurt 都有所為，難怪我奶奶今次返香港前同我講：「俾心機揍女，佢唔易揍架！」不過見佢擘大個咀又食得好，我都好開心！

領詩

昨晚領詩嘅時候有幾次自己唱到某啲歌詞嘅時候諗起自己有過當中嘅經歷，眼淚就响眼中打轉！自己強忍眼淚，但聲音已經出賣我，甚至有些位置唱不出來！我唔知道有幾多弟兄姊妹被那些詩歌感動或有所領受，但昨晚的經歷卻令我想到有位對話劇十分有經驗的弟兄曾對我說：「要寫一個好劇本，首先自己要被那故事感動，才能產生共鳴。」引用在領詩上可以是：「要帶好詩歌，首先自己要被那詩歌感動，才能產生共鳴。」感謝主！使我能在事奉中，再經歷祂的愛和恩惠。

同in-laws事奉

今晚我同我 brother and sister in- law預備明晚團契領詩。已經好耐無响團契領詩，所以自己好高興同感謝神有呢個事奉機會。更加感恩係我 sister in-law 係彈琴高手，而我哋又住得近可以方便佢幫我練歌！好多謝佢肯用幾個鐘頭同我一齊練習，又有耐性幫我執好點唱準拍子！我brother in-law 又唔戒意今晚我阻佢睇 hockey，幫我 run powerpoint，make sure 一切 ok。其實明天係佢哋一個特別日子，佢吔都肯犧牲自己嘅私人時間同我一齊事奉，我真係好感動！亦感謝神賜俾我有可以一齊事奉嘅 in-laws!

別人的遭遇

今晚預備團契領詩嘅時候有幾次差啲忍唔住喊！因為歌詞令我諗到我一個朋友嘅遭遇，將佢嘅經歷代入歌曲當中真係好貼切！再次令我感受到佢所感受，替佢傷心，難過！其實如果我哋能夠多啲切身處地去感受人哋嘅感受，明白對方嘅處境，我哋會識得去關心佢，安慰佢！但係最重要係要讓佢睇到神响當中對佢嘅安慰同醫治，明白神要佢所經歷嘅係要彰顯神嘅愛！

半日假

今日返工後才知道下晝的appointments 全部除消，我第一個反應係好開心咁話有半日假！之後我內心就出現爭扎：提早去daycare接女返屋企定係自己返屋企休息同做自己嘢(suppose老公今日去接)？呢個爭扎係我人生中最短嘅爭扎，半秒內而有決定：接女！其實我真係好攰，唔想湊女！但係我內心好想有多啲時間同佢一齊，所以決定接女返屋企同佢玩！佢可能作病，所以幾黐身，要我在她身邊或者陪佢玩攪到我更加攰！不過我好享受同佢一齊，特別見佢好開心咁對我笑！我會同佢一齊笑，然後引佢再開心多啲！等佢知道我好鐘意同佢一齊！其實每次同個女玩得開心或者見佢好enjoy同我一齊嘅時候，我都好感動！因為我總覺得當佢越來越大個嘅時侯會有佢自己嘅生活圈子，就會越少同我一齊！雖然我要放棄好多自己嘅想做嘅嘢，但係我相信好多嘢唔係好緊要，或者將來無機會再做。但係如果我而家唔俾時間同個女一齊，將來我有時間同佢一齊，佢都未必有時間或肯同我一齊，甚至未必有機會一齊！所以我要抓緊而家可以同佢一齊嘅時間！

發脾氣

女女越來越會發脾氣，一不滿意或不高興便會"dum" 嘢，掃嘢，大嗌！加上佢瞪大眼睛，你可以肯定佢真係好唔happy!作為媽媽嘅我當然唔鼓勵佢呢個行為，所以會對佢話唔可以咁樣(行為不當)！跟住我會攬住佢，錫佢，等佢可以calm down(明白佢感受)！但其實我都幾羨慕佢可以咁放膽，咁正接表達自己嘅不滿。大人會因為唔同嘅原因而隱藏自己嘅感受，特別係唔開心，唔滿意等負面嘅情緒。我哋會用唔同方法去 遮掩呢啲情緒，因為怕人話自己太負面，唔成熟，太諗埋一面....等等嘅批評。已經唔開心，再比人咁講，即係自己送上門比人"dum"一腳，攞嚟衰！於是我哋唔再表達真我嘅一面，而係變成皮笑肉笑心不笑嘅人！可悲！

鬧情緒

呢排好多時情緒起伏好大，心情時好時壞。自己知發生咩事，就係要處理以往嘅事！但係過程係複雜嘅，思緒係混亂嘅！响呢啲情況之下最遭殃嘅係我老公！佢要硬食我啲脾氣兼唔知自己係咪做錯嘢同唔知點氹我！但佢EQ真係好高，可以唔向我發脾氣，只係靜觀其變，待我處理好自己情緒然後向他解釋發生咩事，佢再同我講幾句佢嘅感受佢就無事！好多時我都會諗，如果我係佢我真係無佢咁高EQ，一定炒硬兼可能分手收場！所以每次鬧完情緒後，我都會深深感受老公對我嘅痛錫同不離不棄！

有錢人死了

呢排嘅熱門話題係香港女首富龔如心逝世，遺產會如何分配？有錢人死後最令人關注嘅往往係佢有幾多遺產同遺產會俾邊個。我都想做有錢人，因為買嘢唔洗睇價錢。但係我覺得做有錢嘅女人，通常都好難有好歸宿。最可悲係死後啲人所談論自己嘅話題只係自己生前愛過幾多個男人同份遺產有幾多兼俾邊個。感謝主！我唔係有錢人！我有一個愛錫自己嘅老公，雖然唔可以唔睇價錢買嘢，但老公都俾我好大自由度買嘢！當然最重要係佢對我的痛愛使我覺得幸福仍令我學習如何去愛！愛身邊嘅人同接受他/她們的愛！我希望我死後他/她們會懷念彼此嘅愛！

特別有力的一日

今日過得特別有力！一早去另一間教會聚會，因為想了解別的教會如何崇拜，而且給當中弟兄姊妹鼓勵，再讓女女參加Easter Kids Party，可謂一舉三得！之後同弟兄姊妹吃午餐，彼此交通！回家後帶女女去我父母家，再同奶奶去買餸，然後一同去我父母家。因為女女睡了，所以我有時間幫媽咪填申請表。之後回家吃過晚飯後，我幫女女洗澡後便替她縫補褲子。跟著換床單，然後執拾女女的舊衣服。之後"um" 女女瞓，再上網同寫blog！Oh！今日覺得過得特別有力唔係因為做咗好多野，而係我頭痛同鼻塞咗成日，都可以做唔停又唔覺攰！唯一我可以解釋嘅係所做嘅野全都係我想做嘅，所以分外有勁！

中文寫blog

我要用中文寫blog係要付出代價，就係要慢慢諗點打！但係好處係更正接表達自己嘅意思。有個中文打字了得嘅老公好處係可以叫佢幫我打中文文章，但係唔好處係唔可以叫佢幫我打中文blog！所以都係要自己慢慢去打blog！