買唔買

今次返香港當然有掃貨，但係無以往咁勁！而家個心態係「買到咪買，買唔到無損失」！甚至會識唔買！本來有auntie話識人買名牌衫好平，DKNY ，TOMMY HILFIGER，CALVIN KLEIN...$90有交易！我梗係第一時間同佢約時間掃貨。但係早兩日同家姐响旺角掃完貨覺得都掃夠，再同auntie買都係因為個啲係名牌，虛榮心作祟，所以我同auntie講唔去。我唔想比物質嘅嘢控制自己，而係我可以選擇買唔買！呢個功課要好好學！

喊唔喊

好多大人見到小朋友喊都會用各種方法令對方收聲。原因可能係佢哋怕人喊，唔知點算；覺得喊係好煩；怕人哋以為佢‘正’到人喊，覺得尷尬；喊係無用嘅表現...等等。於是用各樣方法停止或制止人喊！其實喊有咩問題！佢喊係一種情緒表現，想表達佢嘅感受。從佢喊嘅表現可以知佢係嬲，傷心，悲哀，失望...等等。唔比佢喊即係話佢知你唔想知佢有咩感受，正係要佢聽你話快啲「收聲」。如果佢真係聽你話收聲，慢慢佢就會唔識喊！無論有咩衝擊，佢都會「好冷靜」，直至佢無力撐就會崩潰！然後啲人就好驚訝咁問點解佢會變成咁！如果佢可以答佢哋，佢會話：「咪因為你哋咯！唔比我喊！咁我只可以屈埋屈埋，而家我咪支持唔住咯！咩你哋叫人做嘢之前，唔知會有咁嘅後果咩？」所以我對住個女有一種心態就係「唔怕妳喊，最怕妳唔喊！」

寵妳

一個人嘅性格除咗先天影響，後天影響更緊要。如果人人都當妳係公主，樣樣都就妳，我一啲都唔會怪妳變成‘蠻人’，因為係環境造成，大部份人都會恃寵生驕，我最多對就妳嘅人搖頭嘆氣。但如果妳係我個女，比人咁就，佢哋重要話一定寵妳，等妳父母執手尾，我就好火滾！點可以咁不負責任！？「孫係要寵，仔係要教」邊個諗出嚟？佢哋只係為自己想做嘅嘢搵個理由！最慘係到個孫真係開始多扭計，父母要教個陣，佢哋又會覺得我哋唔識教，覺得我哋太硬！但係佢哋無諗係因為佢哋太就太寵個孫而令佢多扭計，我哋要教返好佢！做任何事我哋都要承擔後果，但係要我承擔可以避免嘅人為後果，我就真係好唔開心！

媽咪買衫

我媽咪十年到唔會買衫，佢嘅“新衫”係著我同家姐嘅舊衫。昨日我哋三母女要去荃灣做嘢，沿途有好多boutiques，我同家姐幫媽咪揀衫然後叫佢買。佢買咗6件衫2條褲就話買夠唔買！真係比佢激死！佢返屋企試衫件件到好啱佢style，好睇！我同佢講下星期我同家姐去旺角“掃貨”叫佢一齊去，佢話唔去，我就話唔緊要，我可以同家姐幫佢“掃貨”。係時候要同媽咪攪返個look，唔好埋沒佢嘅風釆！

老公變咗

今次返香港有個驚喜就係老公步伐同轉數快咗！第一日同佢行街立即發現佢好跟到香港人步伐，我竟然要叫佢行慢啲，因為我仲係行梗加拿大人嘅速度！佢知我因為不必要原因而食唔到想食嘅嘢，而要食唔想食嘅嘢，就同我講遲啲同我去食！我個心已經好甜，佢重同我講佢對件事嘅感受，‘正’！行街嗰陣同佢傾計，佢又好快有反應重有時好抵死！哈，我同佢講佢返嚟香港醒咗，佢話個女唔响身邊可以集中响其他事上。可想而知佢平時嘅focus係响邊到啦！

一個好開始

今次返香港比想像中好！第一次坐飛機可以睇幾套戲，食飛機餐，瞓兩次覺。第二日個女已經可以比奶奶睇，我同老公可以拍拖買嘢。好快同舊朋友約時間見面，時間都可以就到。Jetlag 都唔係太差，第二晚可以瞓五個鍾。出發前嘅concern，可以一一消除！三個星期嘅假期有一個好開始，真係要多謝大家嘅禱告，使神讓我可以relax & enjoy my vacation！

睇書

我好鍾意睇書，床頭有一幢書係我瞓覺前揀去睇。最近發覺自己睇書係左腦入，有腦出！睇嘅時候知道內容講咩，亦好有興趣睇；但唔知點解，好快就唔記得！如果無bookmark，可以當新咁睇！都幾frustrated，想同人share又唔記得內容，自己想remind當中學到嘅嘢又recall唔到！下個月要講workshop，求神比我記得睇過嘅資料，唔係我就有排都睇唔完要睇嘅書！

為你禱告

朋友，知道你有需要心理輔導，但就因為朋友嘅關係，唔太容易將自己軟弱一面對我展現，所以唔放便搵我幫忙。朋友，我高興你對我嘅坦白，你嘅需要我會用禱告幫助，求神醫治你嘅傷痛。

中文打字

我老公中文打字好掂，所以當我趕住要交搞或者懶得打就會要佢出手相助。佢亦係我人肉中文輸入字典及打電話問中文輸入法！先者係我有字唔識打而佢响我附近問佢快過我查字典，後者係我有字唔識打而佢唔响屋企，我又懶查字典或者我唔响屋企又無字典查，我就會打電話問佢點打！兩者佢都會發揮到金牌打手嘅威力！如果無佢我就無咁容易交搞，幫老闆做translation同寫blog。老公，再次證明你對我好更要架！:)

返港

呢個星期六就返香港，但唔知點解無興奮雀躍嘅感覺，重有啲唔多想返，所以未提起勁執行李！相信係我想見好多friends 但又要就個女啲schedule，又怕老公自己睇女攪到佢好tired同無自己free time，無得見晒啲friend，shopping 又係無單身咁爽，之後返Vancouver又要攪jetlag，好煩！希望快啲調較好心情可以enjoy the trip!

Let Go and Heal

囡囡今晚又哭著說唔要去AWANA！連講幾次「我唔鍾意！」我見都佢咁樣個心都唔舒服，同老公相量可能等囡囡遲啲先再返，唔想traumatize個女令佢唔鍾意返church。當我一個人揸車返church時覺得sad，因為我要接受個女唔ready去AWANA，代表我要let go對佢嘅expectation:佢同同年嘅小朋友一樣！但因為佢係年未出世，所以佢如果而家同同年嘅小朋友一樣，表示佢係比佢哋advanced！(兩歲半同三歲嘅developmental stage 係有好大距離)其實我對佢呢個expectation係因為my inner child嘅成長過程一路都要not being behind，要being advanced！幾辛苦都要撐落去！所以個女嘅情況triggered 我嘅pain，但係go thru the grieving process is a way to heal my pain！感謝神，讓我可以睇重囡囡嘅感受，然後睇見自己嘅傷口，有機會讓神醫治！